स्याङ्जाको पुतलीबजारमा आँधीखोला महोत्सव सुरू
अक्षराङ्क संवाददाता
स्याङ्जाको सदरमुकाम पुतलीबजारको मालेबगरस्थित खेलमैदानमा आँधीखोला महोत्सव सुरू भएको छ । आजबाट सुरू भएको महोत्सवको समुद्घाटन पुतलीबजार नगर प्रमुख तुल्सीराम रेग्मीले गर्नुभएको छ ।
समुद्घाटनपछि बोल्दै प्रमुख अतिथि रेग्मीले जिल्लामा उत्पादित सुन्तला, कफी, अदुवा, आलु लगायतका कृषिजन्य उत्पादनलाई बजारीकरण गर्दै आयआर्जनमा जोड्न सहयोग पुग्ने गरी महोत्सव अघि बढ्ने विश्वास व्यक्त गर्नुभयो ।
कार्यक्रममा पुतलीबजार उपप्रमुख देवी अर्याल, प्रमुख जिल्ला अधिकारी सुनिता नेपाल, च्याम्बर अफ कमर्शका केन्द्रिय सदस्य किसन सुनुवार, पुतलीबजारका निवर्तमान प्रमुख सीमा क्षेत्री, नेपाली कांग्रेसका प्रवक्ता भरतप्रसाद लम्साल, नेकपा एमाले उपसचिव तारा शर्मा, नेकपा माओवादी नगर अध्यक्ष नारायण लम्साल, राष्ट्रिय स्वतन्त्र पार्टीका नगर अध्यक्ष बसन्त पंगेनीलगायतले बोल्नुभएको थियो ।
स्याङ्जाली कलाकार लोकनाथ सापकोटा, शिव हमाल, तारा पौडेल लगायतको प्रस्तुति रहेको उक्त महोत्सवमा विभिन्न सांस्कृतिक कार्यक्रमहरू आयोजना गरिने च्याम्बर्स अफ कमर्सका अध्यक्ष लोकनाथ रेग्मीले बताउनुभयो ।
च्याम्बर अफ कमर्श स्याङजाले आयोजना गरेको उक्त महोत्सवमा स्याङ्जा उद्योग वाणिज्य सङघको समेत साथ रहेको आयोजकले जनाएका छन् ।
